site templates free download

 2019 HARTKLOP ARGIEF - Januarie | Februarie | Maart | April | Mei | Junie | Julie | Augustus | September | Oktober | November | Desember


Mobirise

Laaste uitgawe van 2019

24 November 2019

Liewe LIGweerkaatsers, Hierdie is die laaste Hartklop van 2019.

SONDAGOGGEND SE BOODSKAP DEUR Ds. Michiel de Kock
Skriflesing: Johannes 15 v. 1 – 17 “Bly in My“

Jesus moedig ons aan om in Hom te bly. Ons Vader verlang dat ons groot vrug sal dra vir Sy Koninkryk. Daar is net een manier hoe ons vrug kan dra wat ons Vader se hart sal bly maak en dit is om soos die loot in die Wingerdstok, Jesus, te bly. 

Sien julle Sondag! 

Mobirise

17 November 2019

Liewe LIGweerkaatsers, Hier is die nuutste Hartklop.

SONDAGOGGEND SE BOODSKAP DEUR DS ANTON DUVENHAGE
Maak nie saak hoe versigtig ons leef of hoe hard ons probeer om dit te vermy nie - lewensstorms is `n realiteit en ons word een of ander tyd daardeur getref!

Aandnagmaal 18:00 deur Dr Clifford Heys

Sien julle Sondag!

Mobirise

10 November 2019

Liewe LIGweerkaatsers,

SONDAGOGGEND SE BOODSKAP DEUR DR CLIFFORD HEYS

‘... maar God ’

‘Maar ek’:
Ons ken die woorde “... maar ek ” alte goed. God roep Abram om die vader van die nasies te wees, maar hy antwoord
“... maar ek is te oud”. Moses?
“... maar ek hakkel”. Ragab?
“... maar ek is ‘n prostituut”. Rut?
“... maar ek is ‘n heiden”. Petrus?
“ ... maar ek is dan net ’n visserman”.
Noem hulle op. En ons is nie veel anders nie. Ons sê baie gou
“... maar ek

”... ‘Maar God’: Die woorde
“... maar God” som die Bybel op! Dié twee woorde
“... maar God” – kom nie minder as 45 maal in die Bybel voor nie!

Daar is geen aanddiens nie.

Sien julle Sondag!

Mobirise

3 November 2019

Liewe LIGweerkaatsers, ons is so opgewonde vir die Dankbaarheidsfees hierdie Sondag. Ons bid dat elkeen van u spesiaal welkom sal voel. Ons bid dat ons met voorbereide en dankbare harte sal kom. Ons bid ook dat die groepe na die tyd sommer lekker gaan saamkuier en ook op hierdie manier Vader gaan verheerlik. (Lys van groepe aangeheg).

Ons nooi u daarom spesiaal en by die naam uit om Sondagoggend saam met ons te kom kniel in Vader se teenwoordigheid. Ons gaan die oggend aan HOM wy en aan Hom al die lof, eer en dank gee.

Sondagaand nooi Anton en die Teentrixband u uit om verder saam te kom sing. Welkom!

Mag u elkeen die komende naweek en week tyd maak om Vader God te eer vir alles in u lewe.

Sien julle Sondag!

Mobirise

27 Oktober 2019

Liewe LIGweerkaatsers, elke keer as die reen so val, kan ek nie anders as om dit met Vader se seën te vergelyk nie. Dit was skoon, dit bring lewe, bring lafenis, voed ons. Verseker soos wat Jesus vir ons gebring het. Mag u almal vandag spesiaal daaraan herinner word.

Sondagoggend praat ons oor vreugde! Ek glo dat dit iets is waarna almal van ons streef of hoop. Baie van ons beleef dit in oomblikke, selfs langer tye, maar daar is ook tye wat ons daarsonder voel. Is dit moontlik om waarlik altyd vreugdevol te leef? Wilhelm nooi u almal uit om Sondagoggend saam te kom gesels daaroor.

Sondagaand gesels Anton met kunsternaar Lizé van der Walt oor haar christenskap in die kunswêreld. U is almal hartlik welkom om na haar inspirerende verhaal te kom luister.

Mag u elkeen hierdie komende naweek en week die wonder van God se genade, wat dit waarlik vir ons almal beteken, weer oordink, jou eie maak en gaan uitleef.

Sien julle Sondag! 

Mobirise

20 Oktober 2019

Liewe LIGweerkaatsers, die afgelope week sit ons leierspan bymekaar en doen beplanning, en ons almal besef:  Die jaar is amper op sy kop!  Dit kan maklik gebeur dat mens kan paniekerig of benoud raak en wonder hoe jy alles gaan klaarkry voor die vakansie.  Maar, gelukkig onthou ons toe betyds dat ons Vader in soveel skrifgedeeltes vir ons weer en weer se om net rustig te raak by HOM.  Kom sit by Sy voete, haal asem, ontspan, ja, jy kan!  Dankie Here vir die voorreg om aan U voete te sit en te onthou wat eintlik belangrik is.

Ons nooi u graag hierdie Sondagoggend om saam met Wilhelm te kom gesels oor motorfietse.  Jip, u het reg gelees.  Ek het 'n vermoede hierdie is een van daardie boodskappe wat u nie graag wil misloop nie.

Sondagaand gesels Anton, tydens die reeks Kom sit 'n bietjie, met Angelo van Shalom Ministries in Hawston.  Hy kom deel sy pad met die Lewende God in soms baie moeilike en uitdagende omstandighede.  Hierdie is verseker 'n Godstorie wat u nie wil mis nie.  Welkom.

Mag u elkeen hierdie komende naweek en week tyd eenvoudig uitsit om stil te gaan sit by U Vader.  Ervaar dan Sy rus, vrede en liefde in oorvloed.

Sien julle Sondag! 

Mobirise

13 Oktober 2019

Liewe Ligdraers,

Hierdie tyd van die jaar is gewoonlik ‘n interessante tyd van die jaar. Aan die een kant raak die lys van goed wat gedoen moet word, al hoe langer en die druk al hoe groter om alles klaar te kry voor die einde van die jaar. Aan die ander kant is daar ‘n opgewondenheid wat begin borrel, opgewondenheid oor ‘n vakansie wat nader kom, familie of vriende wat kom kuier. Ons bid dat u almal hierdie tyd van druk en opgewondenheid geniet en elke dag LEEF vir HOM!

Sondagoggend gesels Michiel met ons oor hoe ‘n christen leef vandag. Al gehoor van hoe jy Jesus kan “aantrek” soos ‘n kleed? Kom gesels gerus saam met ons daaroor.
Sondagaand gaan die reeks, “Kom sit ‘n bietjie” voort en Anton gesels met Rudolf van Burgundyrestaurant oor die lewe van ‘n christen in die besigheidswereld. U is almal baie welkom.

Mag u elkeen hierdie komende naweek en week tyd maak ons Jesus “aan te trek” om waarlik kinders van die LIG te wees oral waar u gaan.

Sien julle Sondag! 

Mobirise

6 OKTOBER 2019

Liewe LIGweerkaatsers, om waarlik man van God te wees, kan vir baie van ons nogal soos 'n groot uitdaging voel.  Kan mens regtig (in vandag se tye en omstandighede) al die karaktereinskappe van 'n man van God uitleef?  Ja, ons word verseker uitgedaag vandag.  Gelukkig het Jesus vir ons 'n antwoord en volg ons die verhaal van 'n kryger.  

Hierdie Sondagoggend wil ons daarom ALLE manne baie spesiaal uitnooi. Die hele diens gaan ons ekstra aandag gee en fokus op ons manne.  Ons word ook bedien deur manne, die voorsang, die verwelkoming, ek dink hulle gaan tot skottelgoed was!  Ons hoop om hulle almal te sien Sondag vir 'n baie, baie spesiale oggend.

Net om dit nog meer spesiaal te maak, nooi ons ook hul vroue, vriendinne, moeders, dogters saam.  Ons het ook die voorreg om nagmaal te gebruik - 'n geskenk so uit Vader God se hart.

Mag u elkeen hierdie komende naweek en week, die Vaderhart van God hoor en ervaar, en vir ons manne - dat hulle in Jesus se voetspore sal volg as voorbeeld van man van God wees.

Sien julle Sondag! 

Mobirise

29 September 2019

Liewe LIGweerkaatsers, die lente is seker een van die mooiste seisoen met alles wat so blom, die nuwe lewe wat oral uitkom en sommer net hoop bring.  Dankie Here vir die prag rondom ons wat ons elke dag kan geniet.

Sondagoggend nooi Clifford u almal uit om saam te gesels oor driehoeke - die wat plat staan en die wat onderstebo is.  Wat het dit met die Here te doen, kan u wonder.  Wel, soos ons Teacher Heys ken, is hierdie een van daardie boodskappe wat u nie graag wil misloop nie.  Bring u kuiergaste, bring u familie en vriende en kom spandeer tyd saam met mede-kinders van God.  En daarna kan u verder die naweek heerlik saam geniet, wetend dat die Verlosser LEEF!

Sien julle Sondag! 

Mobirise

22 September 2019

Liewe LIGweerkaatsers, soms voel dit asof die woordjie "Lewensvreugde" ons bly ontglip.   Daar is soveel uitdagings wat ons op verskillende vlakke beleef - in ons land, in ons gemeenskap, in ons families, gesinne en vriendekring.  
Maar ... 
Paulus het ook daarmee te doen gekry tydens sy bediening en het dit ook beleef in van die gemeentes daardie tyd.  Daarom skryf hy 'n brief aan die gemeente van Fillipense.  Hierdie is net weer 'n bewys dat die Woord van God absoluut tydloos is, want daardie brief kon vir ons geskryf gewees het.
Ds Johann Smith nooi u almal hartlik uit om hierdie Sondagoggend saam te kom luister na die voorlees van hierdie brief aan ons.  En wie weet, dalk is daar antwoorde daar waarvoor ons al lankal wag.

Sien julle Sondag! 

Mobirise

15 SEPTEMBER 2019

Liewe LIGweerkaatsers, kindertjies was vir Jesus nog altyd ekstra spesiaal.  Hy het sy dissipels spesiaal opdrag gegee om hulle na hom toe te bring.  Ons weet dat hoe HY oor hulle voel verseker nie verander het nie.  En so is dit dan vir ons as ouers die voorreg om die kinders wat die Here aan ons toevertrou het, te versorg, te leer, te bemoedig en te koester.

Daarom nooi ons graag spesiaal alle ouers (oupa en ouma ook baie welkom) uit, om Sondagoggend saam te kom gesels oor hoe die Here bedoel het ons hulle moet koester.  Ds Michiel gesels saam met Dr Erika Oosthuysen (ons Maatskaplike Werker by die gemeente) oor idees, voorstelle, tegnieke, gevare, en hoop.   Maak dus seker u kom Sondag, want daar is 'n skatkamer vol geskenke, idees en bemoediging vir elke ouer.

Mag u elkeen hierdie komende naweek en week tyd maak om saam met u Hemelse Vader te sit, sommer op Sy skoot, en ook die geborgenheid by HOM ervaar. 

Sien julle Sondag! 

Mobirise

1 SEPTEMBER 2019

Liewe LIGweerkaatsers, dit gons behoorlik hier by die kerk, want julle het reg gelees verlede Sondag - Ja, ons hou 'n regte troue hierdie Sondag!!

Ons praat ook oor die liefde met die tema:  Wie bemin word kan liefhe.  God bemin SY bruid (ons) met 'n onmeetbare, onvoorwaardelike liefde.  Die vraag vanoggend is of jy God toelaat om jou lief te he?
Kom vier hierdie Sondag saam met ons die liefde en ons  nooi spesiaal alle getroude paartjies uit.  Trek julle mooi klere aan, kom vol verwagting en kom deel in die opwinding en dalk selfs weer 'n belofte aan mekaar maak Sondag ....

Mag u elkeen hierdie komende naweek en week die wonder van God se GROOT liefde vir elkeen van ons ervaar en ontvang.

Sien julle Sondag! 

Mobirise

25 AUGUSTUS 2019

Liewe LIGweerkaatsers, vanoggend kyk ek na die winterboom in my tuin, en sowaar, die eerste botsels is reeds besig om oop te gaan! Ek weet nie van julle nie, maar mens voel sommer hoe die nuwe energie en groei borrel in my binneste. Hoop julle net so opgewonde soos ek.

Sondagoggend nooi dr Wilhelm ons om saam te kom gesels oor die uitdagings vir die kerk vandag en hoe ons dalk oorweldig kan voel. Maar, God het altyd vir ons leiding en antwoorde en ons kyk na die Woord en na Moses. U is baie welkom om saam te kom leer en luister hoe God deure oopmaak, deure waaraan ons dalk nog nie eers gedink het nie.

Mag u elkeen hierdie komende naweek en week u oe helder oophou en God raaksien in die alledaagse, die klein dingetjies rondom u. Sien HOM vir wie HY is.

Sien julle Sondag! 

Mobirise

18 AUGUSTUS 2019

Liewe LIGweerkaatsers, vanoggend kyk ek na die winterboom in my tuin, en sowaar, die eerste botsels is reeds besig om oop te gaan! Ek weet nie van julle nie, maar mens voel sommer hoe die nuwe energie en groei borrel in my binneste. Hoop julle net so opgewonde soos ek.

Sondagoggend nooi dr Wilhelm ons om saam te kom gesels oor die uitdagings vir die kerk vandag en hoe ons dalk oorweldig kan voel. Maar, God het altyd vir ons leiding en antwoorde en ons kyk na die Woord en na Moses. U is baie welkom om saam te kom leer en luister hoe God deure oopmaak, deure waaraan ons dalk nog nie eers gedink het nie.

Mag u elkeen hierdie komende naweek en week u oe helder oophou en God raaksien in die alledaagse, die klein dingetjies rondom u. Sien HOM vir wie HY is.

Sien julle Sondag! 

Mobirise

11 AUGUSTUS 2019

Liewe LIGweerkaatsers, wanneer ons aan die sogenaamde randfigure dink, wonder ek soms of ons as kinders van God die woord waarlik verstaan.  Ons raak dalk so gewoond aan die liefde en aanvaarding, verwelkoming by ons gemeente, dat ek wonder hoe ons hierdie mense sien.  Is dit mense wat nog nie die Here aanvaar het as hul Verlosser nie?  Is dit mense wat kwaad is, wat keuses teen God maak?  Of is dit dalk soms ek en jy?  Ons het al baie gelees van mense wat alleen en eenkant voel binne 'n skare.  Is dit dalk ook 'n randfiguur?

Hierdie Sondag gesels ds Anton met ons juis oor mense wat gedink het hulle is nutteloos, hulle sien nie kans om God se opdragte uit te voer nie, hulle hardloop eintlik weg en gaan staan op die rand.  Ons daag u uit om Sondagoggend saam te kom gesels oor gelowiges.

Mag u elkeen hierdie komende naweek en week net weer die wonder van God se genade besef, beleef en gaan leef.

Sien julle Sondag! 

Mobirise

4 AUGUSTUS 2019

Liewe LIGweerkaatsers, vir u wat al oorsee was, sal u onthou dat baie van die toere besoeke aan katedrale insluit.  Die prag en praal daarvan verstom mens, ook hoe lank daar soms gebou was daaraan - praat nie eers van die kostes nie!  Vandag se kerke lyk beslis anders, om verskeie redes.

Sondagoggend gesels dr Wilhelm met ons oor kerke en katedrale en ook dat hulle soms in 'n glaskas gesit word!  Maak seker u kom gesels saam hierdie Sondag.

Sondagaand is die jongmense aan die gang en hulle nooi u almal vriendelik uit om saam te kom sing, lag, gesels en kuier.

Mag u elkeen hierdie komende naweek en week die wonder van Jesus se gemeente hier op aarde weer bedink en aan HOM al die eer gee.

Sien julle Sondag! 

Mobirise

28 JULIE 2019

Liewe LIGweerkaatsers, hierdie Sondagoggend nooi dr Clifford ons om oor ‘n boek te praat waar God se naam glad nie genoem word nie! Ja, ‘n Bybelboek! En soos ons van ons “Teacher” verwag, daag hy ons uit met vier vrae – goeie vrae. Maak dus seker dat u nie die diens hierdie Sondag misloop nie, anders bly van die vrae dalk onbeantwoord.

Sondagaand nooi ds Anton almal uit om saam te kom gesels oor ons geloof as “re”-aksie. Indien enige van u nog nie ‘n aanddiens bygewoon het nie, hier is u geleentheid om te kom deel in die vreugde en wonder van ons pragtige jeug.

Mag u elkeen hierdie komende naweek en week tyd maak om stil te word by God, stil te word en te luister na antwoorde op jou vrae.

Sien julle Sondag! 

Mobirise

14 JULIE 2019

Liewe LIGweerkaatsers, met die skole al weer heerlike aan die gang, voel almal sommer hoe begin die energie weer borrel. Ons hoop u het almal die vakansie geniet, maar ons verlang BAIE en hoop om julle almal hierdie Sondag weer te sien.

Sondagoggend skop ons weg met ‘n groot familiediens en ds Anton nooi u om saam te kom gesels oor VREDE. Met wat die afgelope week in ons dorp gebeur het, dink ek dit is iets waaroor ons baie vrae het, baie oor dink en natuurlik, baie na smag. Kom gesels gerus saam.

Sondagaand nooi ons u ook ALMAL uit om saam te kom behoorlik “Praise & Worship”. Ons Teentrixband oefen en werk hierdie naweek saam met die band van #Imagine en ons sien baie uit daarna om saam te sing! Bring gerus u vriende, familie, sommer almal en kom sing en eer die Lewende God saam met ons.

Mag u elkeen hierdie komende naweek en week die borrel van die Heilige Gees deur u are voel!

Sien julle Sondag!

Mobirise

7 JULIE 2019

Liewe LIGweerkaatsers, wanneer die sonnetjie so deurkom tussen wind en reën, dan sien ek net hoe roep die stoepkamer almal nader. Elkeen gaan sit op sy gunstelingstoel met iets lekker warm om te drink, ‘n goeie boek, ‘n stukkie handwerk of sit sommer net met genotvolle toe oë en bak in die son. Dit herinner my altyd daaraan dat daar verseker warm en ontspantye is tussen die storms van die lewe. Daar is tye wat ons net kan sit en ontspan en behoorlik gekoester word deur Vader se warmte en liefde. Ek bid dat elkeen van u, wanneer die so heerlik deurkom, God se liefde vir elkeen van ons sal onthou, ervaar en aanvaar. Geniet dit!

Sondagoggend sien ons baie uit daarna om vir Ds Johann Smith te verwelkom. Hy kom gesels met ons oor ‘n seënryke lewe. Die vraag wat baie van ons vra, is wat is ‘n seënryke lewe? Hoe weet ons ons lewe ‘n seënryke lewe, en wat as ek as kind van God nie ‘n seënryke lewe ervaar nie? Ds Johann kom gesels met ons en ons soek saam na antwoorde uit Jakob se verhaal in Genesis. U is almal baie welkom om saam met ons op hierdie ontdekkingstog te gaan.

Mag u elkeen hierdie komende naweek en week elke keer wanneer die son so lekker skyn, u gesig oplig en die warmte op u wange voel en dan WEET, God is hier en Hy het my waarlik lief.

Sien julle Sondag! 

Mobirise

30 JUNIE 2019

Liewe LIGweerkaatsers, hierdie week het ons omtrent winterweer beleef met die klassieke Kaapse stormweer.  Ek sien net hoe almal instorm by die kaggelhout verkopers en sakke hout aankoop.  Dit maak my hart sommer ekstra warm, want ek sien hoe gesinne, families, vriende en selfs enkelinge die warmte, lewe en lig van die vuur daardie aand saam kan geniet.  
Dit laat my so dink aan die Heilige Gees, wat gereeld met die beeld van vuur vergelyk word.  As jy 'n vuur dophou, sal jy sien dat die vlamme aanmekaar verander, rondspring en dans en warmte uitstraal op 'n amper bo-natuurlike manier.  So wanneer u weer 'n lekker kaggelvuur aansteek, raak 'n oomblik stil saam die Gees van God, en ervaar SY teenwoordigheid.

Sondagoggend nooi Wilhelm u almal om saam te kom gesels oor GENADE.  Ons as kinders van die Here, besef dat ons glad nie uit verdienste kan lewe nie, maar werklik net uit genade.  Maar dan kom die vraag gereeld in ons as mense op:  "Is dit genoeg?"  Kom gesels gerus saam.

Mag u elkeen hierdie komende naweek en week die warmte, troos en teenwoordigheid van die Heilige Gees sien en ervaar elke keer wat u 'n vuurtjie aansteek.

Sien julle Sondag!! 

Mobirise

23 JUNIE 2019

Liewe LIGweerkaatsers, daar is 'n leuse wat bemarkers gebruik vir winter in Hermanus - hulle noem dit die Secret Season. Ek het nogal gewonder oor die benaming, tot ek op 'n mooi wintersdag gesinne sien speel het op die strand. Hulle het wel serpe en windbrekers aan, maar die son skyn, die branders is spierwit en die strand is so mooi! Die lug in Hermanus is ook mos bekend as Champagne Air - en net om buite te wees, dit saam te geniet - toe verstaan ek die SECRET!

Hierdie Sondagoggend nooi ons u almal hartlik uit om tog die kombers eenkant toe te gooi, op te staan uit 'n warm bed, en saam die warmte, hartlikheid en liefde van u familie in Christus te kom geniet en deel. Ons gesels saam oor die geskenk van die Heilige Gees wat dit eintlik onmoontlik maak om stil te bly. U is so welkom!

Mag u elkeen hierdie komende naweek en week saam as gesin, saam as vriende of sommer net by uself saam met Jesus, die SECRET ontdek van winter, van Jesus-kind wees, van kind van God wees.

Sien julle Sondag!! 

Mobirise

16 JUNIE 2019

Liewe LIGweerkaatsers, so na Pinkstertyd is dit 'n wonderlike tyd van die jaar waar die VRUG van die Heilige Gees grondvat! Ons gaan nou in Koninkrykstyd in en saam met dit kom hande en voete. Dis tyd om die liefde van Jesus, die teenwoordigheid van die Heilige Gees en die Almag van God sigbaar te maak deur woorde, deur dade, deur dien. Kom, kom saam!!

Ons nooi u graag om hierdie Sondagoggend saam te kom gesels met Wilhelm oor lewensvreugde. Kan mens nog regtig JOY beleef in vandag se omstandighede? Is dit moontlik om waarlik met vreugde elke dag te benader? Kom ons luister wat het God vir ons te leer daaroor in SY woord.

Mag u almal wat op vakansie is, dit geniet en goed uitrus. Mag u almal wat steeds moet werk, ook vreugde in dit vind. En mag u almal hierdie komende naweek en week die vreugde en vrug van die Heilige Gees in u voel borrel.

Sien julle Sondag!

Mobirise

9 JUNIE 2019

‘N WONDERLIKE GELEENTHEID!
Ons nooi graag enige persone (tieners, volwassenes, afgetredenes) wat
graag wil deel wees van die energieke en dinamiese span by die Kommunikasie-bediening, om vir Karin by die Kerkkantoor te kontak.
Ons sal u graag leer hoe om op die nuwe webwerf te werk (ons soek nog spanlede). Ons sal u ook leer van kamerawerk, joer-nalistiek, grafiese ontwerp en sommer nog baie meer!! Hierdie is ‘n wonderlike geleentheid om nuwe “skills” by te leer. HARTLIK WELKOM!!

Mobirise

2 JUNIE 2019

Liewe LIGweerkaatsers, die Heilige Gees is vir baie van ons 'n groot misterie. Daar is soveel beskrywings, opsommings, verduidelikings en simboliek rondom die Heilige Gees, dat mens nogal deurmekaar kan raak. Die Gees word soms beskryf as wind, of as water of selfs vuur! Ons praat graag oor God en oor Jesus, maar wie is die Heilige Gees dan werklik?

Juis om hierdie vraag aan te spreek, nooi ons u met groot opgewondenheid uit na die Pinksterreeks wat hierdie Sondagoggend begin. Die hooftema van die hele reeks is: Waarom nog die Heilige Gees? Ons het ook die groot voorreg om deur 5 verskillende leraars bedien te word. Kyk gerus in die Hartklop vir die volle program.

Mag u elkeen hierdie komende naweek en week saam met ons op reis gaan, in verwondering staan en die inspraak van die Heilige Gees op 'n nuwe en kosbare manier ervaar.

Mobirise

26 MEI 2019

Liewe LIGweerkaatsers, ons lees in die Psalms van die Skepper God, die Almagtige, die Heerser en veral wanneer ons na die natuur, die hemelruim en sterre kyk, ervaar ons die grootheid van God. En dan lees ons weer in Jesaja van die God wat ons vertel dat jou naam in Sy handpalm gegraffeer is. Dit maak amper nie sin nie. Kan dit dieselfde God wees?

Sondagoggend nooi Wilhelm u almal uit om saam te kom dink, luister, hoor wat God vir ons te se het oor ons as mens. Wie is ons? U is so welkom.

Sondagaand kuier ons saam met Anton en die jongmense in die maalruimte. Die vuur gaan brand, daar is wonderlike musiek en aanbidding, daar is saamgesels en hoor by mekaar. U is almal baie welkom om deel te wees.

Mag u elkeen hierdie komende naweek en week tyd maak om stil te gaan staan in die aand, op te kyk na die hemelruim en u te verwonder oor die Skepper God en dat hierdie Almagtige jou naam ken.

Sien julle Sondag! 

Mobirise

19 MEI 2019

Liewe LIGweerkaatsers, ons hoop dit gaan goed met almal en ons het dit baie gemis om die Hartklop elektronies te stuur - ongelukkig was daar tegniese probleme wat gelukkig nou opgelos is.

Hierdie week nooi ons u almal baie spesiaal uit om saam te kom luister na terugvoer van die Sinodesitting hierdie week. Wilhelm en die span gaan ons saam op reis vat oor wat hulle gehoor, gesien en beleef het. Maak dus seker u kom kuier saam, so bly ons almal op hoogte wat in die groter en breer geloofsgemeenskap gebeur.

Sondagaand is ons jongmense weer op hul pos en nooi u almal om saam te kom juig, loof, lag en luister. U is so welkom!

Mag u elkeen die komende naweek en week die eenheid tussen kinders van God koester en tyd maak om vir mekaar te bid, hande te vat en Jesus-liefde uit te deel.

Sien julle Sondag! 

Mobirise

12 MEI 2019

Liewe LIGweerkaatsers, ons is so opgewonde om saam met u hierdie Sondag Moedersdag te vier. Dit is beslis ‘n voorreg om nog ‘n mamma by u te kan he om te bederf en te waardeer. Mag u almal ‘n baie geseende dag saam beleef.

Sondagoggend nooi Michiel u almal uit om juis te kom gesels oor God se Moederhart. Ja, ons Vader het ‘n baie groot Moederhart! Kom luister en gesels gerus saam.

Sondagaand nooi al die tieners en jongmense u uit om saam te kom “Praise & Worship”. Kom geniet die teenwoordigheid van die Here saam met hulle.

Mag u elkeen hierdie komende naweek en week gaan nadink en ook ervaar hoe God ons Moeder ook is. Mag dit vir u elkeen tot groot seen en troos wees.

Sien julle Sondag! 

Mobirise

5 MEI 2019

Liewe LIGweerkaatsers, dis vroegoggend en ons voel almal die byt in die lug – winter is hier! Dit is tradisioneel wanneer plante in ‘n rustyd ingaan, wanneer ons eerder in ons huise kuier voor kaggels as op die strand. Ook ‘n tyd waar ons dalk nie so aktief wil wees nie. Maar vir kinders van God is daar nie seisoene aan die uitbreiding van die Koninkryk van God nie. Vir kinders van God is ons 24/7 aan diens om Sy LIG uit te dra na die wereld rondom ons. Vader, help ons om in hierdie tye nie deure toe te maak nie, help ons om altyd te bly uitreik.

Hierdie Sondagoggend gesels Wilhelm met ons juis oor ons rol as Gemeente in ons land en gemeenskap. Die verkiesing le om die draai en ons as Gemeente het nou juis die geleentheid om Vader se LIG te weerkaats. Ons het hierdie Sondag ook baie spesiale gebeure, baie spesiale sangers en ‘n hele paar verrassings! Maak dus seker u loop nie hierdie Sondagoggend mis nie.

Sondagaand nooi Anton alle tieners, jongmense, ouers, jonk van gees na die aanddiens om 18h00. Ons gesels saam oor Dawid en daar is heerlike Praise & Worship.

Mag u elkeen hierdie komende naweek en week jul liggies helder laat skyn, oral waar u gaan.

Sien julle Sondag!

Mobirise
Adres

Bergstraat 55,
Onrusrivier,
7201

Kontakte

Epos: info@ngkonrusrivier.co.za
Telefoon: (028) 316-2116 

Skakels

YouTube 
Facebook