NGK ONRUS HARTKLOP - 2024-05-26

Die Here het ons geseẽn met ‘n wonderlike Pinkster. Dit vorm deel van die reeks oor ons gestuurdheid as gemeente en as kinders van God. Die doel van ons volgelingskap en ons roeping in Christus is om Hom te verheerlik. Dit gaan alles oor die Koninkryk van God en Sy eer.

Hierdie Sondag is dit juis waaroor dit gaan: God se doel met ons. Ons gaan vanuit hierdie perspektief ook fokus op die verkiesing en vir ons land intree. Dit is baie belangrik dat ons as gemeente en as kinders van God ook onsself in hierdie tyd voor die Here verootmoedig. Dit beteken o.a. dat ons selfondersoek sal doen en seker maak dat dit ook wanneer ons vir ons land intree, in die eerste plek oor God se eer en Koninkryk gaan. Dit is van die uiterste belang dat ons binne die wil van God leef en Sy wil soek terwyl ons ook Sy genade en seẽn afbid oor hierdie mooi land van ons.

‘n Gemeente wat daarna streef om God te verheerlik, gehoorsaam Hom in die uitvoering van Sy roeping vir ons om Sy getuies te wees orals waar Hy ons roep en stuur. So ‘n gemeente het God bo alles lief en hulle naaste soos hulleself. Hulle soek daarna om God self hulle diepste begeerte te maak soos Dawid in Psalm 63 sệ: “Ek soek U o God, my God, ek dors na U …” Hulle gehoorsaam God in alles en vra die Heilige Gees om ook hulle gedagtes in lyn met God se gedagtes te bring. 2 Kor 10 v. 5.

Hulle stel hulleself tot beskikking van die Here deur wie Hy kan werk en vrug dra vir Sy Koninkryk. Rom. 12 v.1 en 2 en Joh.15v. 1 – 17.

Laat ons die Here vra om ons gedagtes te rig sodat ons kan onderskei wat Sy wil is en wat vir Hom goed en aanneemlik en waar is.

Bespreek of dink na of dit vir jou moontlik is om in lyn met God se wil en tot eer van Sy Naam oor Suid-Afrika te dink en jou stem uit te bring op 29 Mei.

Michiel

Binnekamer

Verkiesing! Nuwe Regering! Gebed ...? Werk dit ...?

Ja, In 1994 het dit gewerk. Mandela was ŉ brugbouer.
Nee, nie in 2009 nie? Nie met mnr Zuma nie.
En nou, 2024 ...?

Ek beantwoord hierdie vraag met ‘n stukkie geskiedenis:

In Augustus 1961 het aardskommunis Walter Ulbricht, (van die Duitse Demokratiese Republiek: DDR) byna oornag die berugte ‘Berlynse Muur’ laat oprig. Hy het dit genoem ŉ "Anti-fascistiese Beskermingsmuur". Die eintlike doel van die ‘Muur’ (die ‘Ystergordyn’, die ‘Skandmuur’) was om die inwoners van Kommunistiese Oos-Berlyn te verhoed om uit die land na die Weste te vlug. (Baie het dit tog gewaag en baie het die nie gemaak nie).

In 1989 was daar ŉ politieke onrus in die Oosbloklande wat gelei het tot o.a. die val van Sowjet-regerings. Maar dit was juis in hierdie tyd van onrus dat Pastoor Christian Führer die bekende ‘Thomas Kirche’ (ook bekend as orrelis, ‘JS Bach se Kerk’) oopgestel het vir Maandagaand-gebede en die hardop lees van die Saligsprekinge – Koninkryk leefstyl!

Aanvanklike het ŉ handjie vol opgedaag, maar mettertyd het die getalle vinnig aangegroei. Na elke biduur het die bidders (waarvan baie kommuniste was) die kerk met ŉ brandende kers in die een hand verlaat, en met die ander hand het hulle die vlammetjie beskerm teen die wind. Só het hulle deur die strate gestap en Lutherse Liedere gesing. Dit was simbolies van die gelowiges as die `Lig vir die Wêreld’ wat deur die Hand van God beskerm word. Pastoor Wonnenberger het ook die St. Nikolai Kirche oopgestel om al die bidders te akkommodeer. Die getalle bidders met kers-in-die-hand het gegroei tot 70 00, tot 120 000 en later tot 500 000.

Die leier van die Kommunistiese Party in Oos-Duitsland was Erich Honecker. Hy het hierdie massa bidders met kers-in-die-hand gevrees. Honecker het die 6 000 polisie opdrag gegee om te skiet as daar probleme sou kom. “Schießen um zu Töten!“
En toe gebeur dit: Om middernag, 9 November 1989, gaan die ‘checkpoints’ op onverklaarbare wyse oop! Van die opdrag: “Schießen um zu Töten” (“Skiet dood”) het niks van gekom nie! En in die strate van Leipzig word groot baniere oor die strate gespan: “Wir danken Dir, Kirche” (Kerke, ons almal sê ‘Dankie’).

Dit het gebed gedoen.

Toe! Vandag ...?

Vir Voorbidding:

Bid vir die OVK en die reëlings.
Bid vir die Partye en kandidate. Bid dat die Here Sy hand op hul skouers sal plaas. (Neem kennis: Daar is die “Under-45’s Club”. In al die partye is daar jong kandidate wat nuut dink en belofte toon).
Bid vir die kiesers as hulle 3 stembriewe ontvang, en veral as die stembriewe vreemd en ‘verwarrend’ lank is.
Bid vir ons met ons onsekerhede. Bid dat “volmaakte liefde die vrees sal verdryf”, juis wanneer ons die toekoms onder die nuwe regering
mag vrees - ons geldsake en ons pensioene, ons gesondheidsversekering, ons oudag en meer (Joh. 4v18).
Bid vir die kerk om te kan bid: “Here, ons vra nie dat U aan ons kant sal wees nie, maar dat ons aan U kant sal wees”.
Bid die Here se seën af op ons land (Num. 6v4-26). Spesiale

Dagstukkies: In die nuwe week ontvang u spesiale dagstukkies met die oog op die verkiesing. Gebedsversoeke sal gegee word. Bid asseblief, maar bid soos die Here u lei.

Ons tree in vir ons Afvlerk lidmate, familie en vriende: Henk en Hybrie Lombard, Ina en Rassie Erasmus, Ronnie Weber, Johan Halls, Wilna Snyman, Willem Viljoen, Louis van Brakel, Attie en Bets Eksteen, Nella van Niekerk, Mareta Nel, Suzette van der Merwe, Annabel Hamilton-Attwell, Johan en Marinda van Schalkwyk, Christa Linnertz, Wena Wiese, Uwe Kersandt, Willie Moolman, Linette de Villiers, Mimrosa de Kock en Bekker van Wyk, Henk le Roux, Jan Brand, Henk Lombard, Chris Boshoff jnr. en Johan Lodewyks.

Ons bid spesiaal saam met Mimrosa. Sy is baie swak en kan nie meer wag om na haar hemelwoning te gaan nie.

So bid ons ook saam met die Nel gesin. Klein Hannah, 8 jaar oud, moes ‘n operasie ondergaan waarin breintumors verwyder is. Sy sterk mooi aan.

Bid ook vir ons gemeente met die ‘Hartklop’ in die hand.

Baie dankie vir u voorbidding. Dit word opreg waardeer.

Coenie, Anton, Wilhelm en Michiel

SDG

Vanuit die Jeugbediening ...

Dit is hierdie jaar vir ons jeug weer ‘n groot voorreg om Victoria-Wes te gaan besoek. Met die oog op voorbidding deel ek graag die daaglikse program met julle:

Ons begin elke oggend met stiltetyd (natuurlik na ‘n vroeë ontbyt) wat bestaan uit lofsang, kort lesing, persoonlike studietyd en kleingroep-bespreking.

Na ons afgesluit het met stiltetyd, begin ons met die dag se voorbereiding (''crafts'' knip, broodjies smeer, kinderbediening optrede finaliseer en hulp in die kombuis soos nodig.)

Rondom 10:00 verlaat ons dan die koshuis waar ons bly, om te gaan opstel vir kinderbediening (kinderbediening vind in VGK Victoria-Wes se saal plaas wat so 3km weg is). ‘n Gedeelte van die span ry dan ook deur die gemeenskap en nooi al die kinders vir die geleentheid. Verlede jaar was daar ongeveer 800 kinders wat opgedaag het! Na ‘n paar interaktiewe liedjies is daar dan ‘n klein toneeltjie wat die tema vir die dag uitbeeld wat gevolg word deur die aanleer van ‘n kort teksgedeelte en die maak van `n ''craft'' in kleiner groep-verband.

Teen ongeveer 12:30 keer ons dan terug koshuis toe vir ete om 13:00 en ‘n bietjie van ‘n rus kans tot 14:30 ... dan is dit tyd vir die middag se aktiwiteite.

Om 15:00 ontmoet ons die jeug op die gemeenskaplike sportveld vir ‘n middag van sport en speel. Na ‘n paar games stap ons (gewoontlik 3 van ons span saam), saam met van die jeug na hulle huise toe vir `n tuisbesoek/kuier. Belangstelling, liefde en omgee is die groot dryfkrag agter hier besoeke. (Ons span word hiervoor toegerus en daar is altyd `n senior uitreiker teenwoordig.)

Na die tuisbesoek is dit weer terug koshuis toe vir aandete. Die laaste bedieningsgeleentheid van die dag begin dan teen 19:00. By die VGK saal ontmoet ons dan die meer senior tieners (en jongvolwassenes) vir ‘n program wat gewoontlik duur tot 21:00. Verlede jaar was daar omtrent 100 van die gemeenskap wat by ons hiervoor aangesluit het.

Die laaste moment van die dag is wanneer ons terugkom by die koshuis en ons as span deur die dag praat en die Here daarvoor prys.

Baie dankie vir almal se belangstelling en voortgesette gebede. Ons is hierdie jaar 34 wat op die uitreik gaan en indien daar enige verdere navrae is, is u meer as welkom om vir my te kontak.

Anton

KERKRAAD

Ons het Maandagaand ons kwartaallikse kerkraadsvergadering gehou. Dit was ’n aangename aand en soos altyd lekker om saam te wees en saam te dink, selfs wanneer daar moeiliker sake op die tafel is. Die saamwees en koinonia is van onskatbare waarde.

Hier is enkele sake uit ons vergadering:

’n Taakspan is gevra om te kyk na ons bedieningstruktuur wanneer ds. Wilhelm se kontrak teen Des 2024 ten einde loop. Ons is reeds maande lank besig met die besinning en gesprekke met die oog op die toekoms. Verskeie scenarios is voorhande.
Ons het nagedink oor die afgelope pinksterreeks en veral ook hoe ons ons roeping verstaan in die lig van Mat 28 en die Groot Opdrag. Die terugvoer oor die pinkster is positief met groot waardering vir almal betrokke.
Die kerkraad het goedgekeur dat ons R100 000 bewillig om te verdeel tussen verskeie erkende organisasies wat besig is met die Groot Opdrag van die Here.
Die kerkraad neem ook kennis van nood en projekte in ons eie omgewing en verbind hulself opnuut om ’n verskil te maak en lig te wees. Voorleggings moet aan die kerkraad gemaak word.
Die kerkraad word vergroot deurdat die gasvryheidbediening en gemeentebediening amptelik deel word van die struktuur van die kerkraad. Murial Pretorius word beroep as leier by gasvryheid terwyl ons steeds bid vir die regte leiers by die Diensverhoudinge bediening asook by Gemeentebediening.
Die Kerkraad neem met groot dankbaarheid kennis van die stand van die gemeente se finansies en bevestig weer ons verbintenis om ’n verskil plaaslik, maar ook verder te maak. Groot dankie aan elke lid van die kerkraad asook elke gemeentelid se voorbidding. – Coenie

Page updated

Google Sites

Report abuse