Om die geslagsregister van mense te lees is nie vir almal interressante leesstof nie. Matteus begin sy evangelie dan ook met 'n lang lys name. Met watter doel? Waarskynlik wil hy daarmee aantoon dat God sy beloftes aan sy volk gestand gedoen het. Elke naam in die register vertel 'n verhaal van sorg en beloftes wat waar word.
Matteus beskryf drie periodes van veertien geslagte om uiteindelik by die geboorte van Jesus uit te kom. Hy begin by Abraham, die vader van die beloftes en loop dan oor na Salomo en die konings van Juda heen. Dit is ook ongewoon dat vroue in geslagsregisters genoem word. Matteus noem vir Tamar, Ragab, Rut en Batseba.
Uit hierdie geslagsregister van Jesus is dit duidelik dat meriete nie die maatstaf is nie. Daar is plek vir die onwaarskynlikes, die sondaars en die vreemdelinge in Jesus se familie. Wat ook merk-waardig is, is dat Josef nie Jesus se biologiese vader is nie. Die verhaal beklemtoon dat Maria 'n maagdelike geboorte gehad het. Jesus is die Seun van God. Die Kersverhaal is inderdaad 'n vreemde verhaal, maar die goeie nuus is juis daarin opgesluit!
Ons dink Sondag verder hieroor na. Welkom en kom met verwagting!
Wilhelm
Voorbidding:
“…Ere aan God in die hoogste hemel, en vrede op aarde vir die mense in wie Hy ‘n welbehae het!” Luk. 2 v. 14.
Ons dank die Here vir ‘n wonderlik geseënde Kerssangdiens asook vir ‘n goeie ontmoeting met die VGK Hawston.
Ons dra die volgende siekes aan die Here se sorg op: Doreen Pretorius, Lisa Kriel, Johan Lodewyks, Hennie Greeff, Piet Marais, Frans Stapelberg (nou in Spescare), Alta Pienaar, George Muntingh, dr. George Watermeyer, Christo Alheit, Berenice Auret, Andre Alberts en Charl van Wyk.
Ons bid ook die Here se troos vir Gerda en Herman Botha nadat haar broer oorlede is.
Ons vra ook voorbidding vir die Kersseisoen: Vir almal wat op reis is, almal wie se kinders, klein-kinders en familie kom kuier en vir ‘n spesiale tyd van vreugde en samesyn in die teenwoordigheid van ons Verlosser, Jesus Christus. Ons bid ook dat die Overstrand veilig sal wees. Ons dra al ons veiligheidsdienste aan die Here se sorg op. Ons bid dat almal verantwoordelik sal wees en dat ons nie brande en onnodige ongelukke sal ervaar nie.
Opregte waardering en seënwense.
Michiel, Coenie, Wilhelm en Anton
AANMELDING
Ons wil jou graag besoek op enige stadium wanneer jy dit nodig het: tydens siekte, operasie, moeilike tye, alleen tye, goeie tye. Ons kan jou net besoek as jy vir ons help deur ons te kontak indien jy ENIGE besoek benodig. Kontak asb die leraar wie jy graag wil hê jou moet besoek. Kontak op enige stadium weer die leraar of een van die ander leraars indien jy nie besoek is nie – dit gebeur soms dat ’n leraar vergeet of dit nie deurgee aan almal nie. -Coenie
