Van al die maniere om God te aanbid, is dankbaarheid heel moontlik die een wat die meeste misgekyk word. Wanneer ons egter bietjie tyd in die Bybel spandeer, sien ons die tema van dankbaarheid baie duidelik raak. Daar is maklik honderde verse wat vir ons sê om uit dankbaarheid God te prys.

Ons sien ook deur na verskeie briewe van Paulus te lees dat om as dankbare mense te lewe, ook God se wil is vir ons lewens. God het van die begin af geweet dat dankbaarheid ‘n positiewe invloed op ons sal hê. Mag ons daarom opnuut plek daarvoor maak in ons daaglikse roetines.

Die YouVersion toep help ons hiermee met die volgende vier maniere:

Skep nuwe denkpatrone. Dr. Caroline Leaf, kognitiewe neurowetenskaplike en skrywer, het gesê: ”Terwyl jy dink, verander jy die struktuur van jou brein.” Dit is nie maklik nie. Ons het egter ‘n keuse waaroor ons dink; kom ons vul dus ons denke met gedagtes van dankbaarheid.

Kies vyf dinge. Maak dit ‘n daaglikse gewoonte om vyf dinge waarvoor jy dankbaar is, hardop te sê of neer te skryf. Jy kan dit enige tyd van die dag doen — oggend of aand!

Stel 'n dankbaarheidsalarm. Kies verskillende tye van die dag. Wanneer die alarm afgaan, vra God om jou aan die seëninge en gawes in jou lewe te herinner en dank Hom daarvoor.

Vertel dit aan iemand. Praat elke dag met iemand oor dit waarvoor jy dankbaar is. Dit is miskien hulle vriendskap, die sonsopkoms, ‘n kragtige oomblik saam met God, of ‘n onverwagse seën wat jy ontvang het. Om dit te sê, maak dit meer werklik.

Dit is lewensbelangrik dat ons ‘n gewoonte daarvan maak om dankbaar te wees sodat wanneer die lewe se storms ons tref, ons sal weet hoe om deur die rowwe waters te vaar. ‘n Deel hiervan is om God te vertrou en selfs om te kies om dankbaar te wees, al verstaan ons nie die wêreld om ons nie.

Hierdie Sondag gaan ons hierdie gewoonte vlerk gee deur Hom te dank vir die afgelope jaar en om opnuut te getuig dat ons ons vertroue in Hom plaas vir die jaar wat voorlê.

Sien julle Sondag!

Anton